ؤل نلِّي اد ناف استان (جواب) دْ اقن غف اون اسستون (سؤال)، ؤجار ن وامو ، اد ضوضان غف-نغ إد مراو (عشرات) ن إسستونن، يلا سي-سن ايني لان د ألمنداد (وجيه) يبها حد أد ي ييشمر يسرس معا-س ، يلا سي-سن ايني لان تاحجورت-س مغ إسوي-س أين د (الهدف-س) غي إ وكلي ن تلخت إضارن.
دي اون إدوران (سطور) إسوي-نغ (هدفنا) د استف (ترتيب) ن تكتوين (أفكار) ماشاك اد إباين د ازعيم ميمي نــــتــولز مغ نزوا غل ؤسوفغ ن اون ؤخدام دي ؤمدون ن ؤنغميس.الاعلام
السؤال مغ أسستون إ يلا يوغلب ن ميدن سمضرانن مغ تخممن دي-س ايند: باتا د الهدف ن ؤسوفغ مغ باتا د تاضفي دي ؤسلفي ن تمسلايت ئ ات مزاب؟
دسات ن واموا الاق اد نسن قد قد د باتا مغ د مانايوا أون المجتمع ن ات مزاب ... ايني ميدن نومن (والفن) قارن ''توات'' د اين د ات مزاب ، يلا واسي يقار ايولو واسي ازدّغ بكري دي إغزر مزاب، نتسلا دخ ''ات إغرسان'' .. داني اد ناس إقت إقت باش اد نسن اون ات مزاب قدقد ديد مانايو ؟
ا وي سنن:
- اين د إنيني إ دلولن دي إقميرن (حدود) ن إغرمان ن ات مزاب؟
- اين د إنيني إ لان زدّغن (يسكنون) دي إغزر ن ات مزاب؟
- اين د إنيني إ لان ساوالن س تومزابت؟
- اين د إنيني إ لان طفن تيسرط ن المذهب الاباضي؟
- اين د إنيني إ لان إمزوران-س (لجدود-نسن) د ات مزاب ؟
بصح س تما ويضيضن حد اد ييني اون إبسيون قاع لان ن تيدت بصح ويجي مدان ، أمغر يلا واسي يلا إزدّغ (إعمر)معانع دي إغزر مزاب بصح ؤل أس- يلّي أد ييلي د توا ت.
يلا دخ واسي يساوال تومزابت ان ؤسوا ن وامان إصماضن ، بصح انفّن-س (دماءه)ويجي ن ات مزاب.
يلا دخ واسي س توات ، اما د نــــتا ؤل يطيف تيسرط ن المذهب
يلا دخ واسي اخزر إمان-س د توات د نـــتا د( أسرتي ) يخلض، إقن سي إمريون-س ويجي د ؤمزاب.
ها باتا نوتف اون تحمالين نلا اد نجمض اد ناف إماننغ أقدا ؤل تنجم اد نوش لجواب يمدا غف هدا ن ئسستونن سيسن...
- ها لوكان مناو ن يمزوارن-ننغ ضالن-أنغ –د س إقن ؤلون أ وي سنن اد أغن سنن نشنين د طاروا-نسن؟ ها باتا ؤسيند عاشن جار-أنغ بسي؟.
- ؤجار ن وامو ...لان د يرجازن د تسدنان تدرن جار-أنغ إمارو لان رقبن بلي أمش ن ات مزاب لاش غرسن العلاقة مع توات ... س وايني تيشلي-نسن تضرن يوغلب مغ تبيدل.
تاضفي ن ويوال ... اون إسوقاسن إمجورا يوعر أمش اد تينيد حدني د ؤمزاب ن تيدت،
بكري يتوغ يزهل أمش اتصقعد ؤقغرسان ، س ؤسراويل د شاشيت د تشبرت لـختني يزهل أمش أتصقع-ت غف حد ويضيضن ـ اما تامطوطت تومزابت اصقاع-س يفسوس أمش.
أمو نلا نساوال غف ؤرقوب-س ن ؤزغار د ؤقون-س ، ها باتا نوتف بسي غل ؤجاج نرقب تمجا د السيرات د لعوايد ن ات مزاب ، إ توغن-ت بكري دي ؤقغرسان أ ويسن زديغ لانت مغ نضانت ؟
داني اد ناف إماننغ دسات يوغلب ن إيد لجواب دخ ؤل تعيدين مدان .. أمغر اش لجواب اد ياس مع-س مناو ن ئسستونن دي-س ايني يلا يزهل دي-س اسني يلا يشرس.
أقدا انبد دسات اون تمشروست تازعلوكت اد نيني أ وي سنن يلايانغ اد نسول اون الأسئلة ؟، دخ باتا د تيشوتار إ يلا إلاق غفنغ ؤل تن-تنحفز ؟ .... دسات اون إد شرا أوي سنن د مانايوا يلا-ياس اد يشمر يسرس أون إبسون؟
ü ان مانش ننا تاسفرست ن اون الأسئلة تازجررت أمش ؤل تقدي ، ألاعاد ابريد ؤل يتوغ يرزم (دسات ميدن) مغ د نظام ن لمجتمع ن ات مزاب ؤل يوشي الطوع إ ويوال اون المواضيع.
س و مّن د ؤجار ، نوفو ، د ازعيم أمش انرني أدسيل غل دسات ننعر س ؤرزام ن تورت إ ؤشمر د ؤسرسي د ويوال غف اون إبسون اد يوش تاضفي غل دسات ، ديس اد نوش تونت إ ييد باب ن ؤسون اش إقن دي أمدون-س أد نعرن سيفاون رزمن-انغ تيطاوين-نغ قاع باش اد ناوض دي مناو ن إد إسوي سي-سن:
· ارني د ؤكوتر ايولو شرا د أزعيم دي توات ، د ؤسوضف-س غل تاروا-نغ غل دسات ، ؤجار ن وامو ، أسيوض-س إ قاع ميدن ، أبريد-نغ دي وامو ، د السنة ن يوش دي إمزانن (الرسل) ، إ لان تواصان غف ؤسجمي ن ءيمان د ؤطوف ن ؤبريد إغدين ، سّيني ، أدياس ؤطوف ن ؤفوس ن حد ويضيضن .
· أبراس غف تمنتال (أسباب) ن تمشراس إ لانت أماس ن توات ، د ؤسرسي ن يفسوتن إ اون تمشراس.
· أبدي د ؤنعار مع إرجازن إ لان بشّن دسات تيرزي د ؤمرارا ن وايني يلا د ازعيم دي توات ، د ؤسلفي ن يبريدن إ ورني د المجتمع-نغ د ؤقيمي ؤجار.
إ واني ننّــا د ؤجار ، نوفو غي انسبد أون ؤبونض ناتف د أمعالت س وايني أغنيوشو ربي إ ؤسوفغ ن أون ؤخدام ، أنعاون سيس مع واسي يلا أبريد يزار-نغ دي ؤشمر د ؤسيلي ن أون المجتمع ، سيس أد نرزم أبريد إ سلمادن د إنعزامن إ ورني د ؤسلمد د ؤكوتر ن أون المجتمع إ يلا يطف إيمان-س د إيجيمن (الاف) ن ايسوقاسن ، إ يلا زديغ يلا يتارّا تييتا إ ترزي-س س ؤجاج د ؤزغار.
تالويت-نغ ايتولو تامقرانت مي نوفو توات-نغ بدن بشن معانغ أون ؤخدام أش حد س وايني ينجم أش حد س وايني يسن ، إ ورني د ؤنعار ديس .
أون ؤخدام ويجي بينا سيس لا د أزوخ ي و لا د شنا ، ويجي د أزوني د ؤشقي ن توفا جار توات-نغ ... ، إسوي-نغ د أوشا ن المكروفون إ واسي أوال-س يفسوس ولا د حد ؤل يتسلي ، دخ د أقاض غل تمزغين إ لانت تسلن-ت باش اسن-د-ياوض أوال أيولو د تاضفي أد ييلي غل ييمال (المستقبل) د أغيل إ ؤخدام أزعيم إ المجتمع ن ات مزاب د ولا إحد ويضيضن(ات وزغار).
تنميرت ...يوري-ت ماس خضير بوقايلة ، أضران غل تومزابت ، ماس الياس ن علي عبد السلام تغردايت / اس ن 13 -10- 2024
تنميرت